Ilul-d lferḥ, din yemmut ! Tḍal-d lehna, din texmet ! Atmaten n yiḍelli, widen tezdi tmara n lfetna, myeɛqalen (ɣef wudem n talwit) d yicenga. Mɣin-d wacciwen, yak si zik izgaren ttemberrazen ! Qefren talwit, sengugen ijga n usirem, fkan nnuba i cwal. Tamurt tuɣal d tabḥat i tudyiwin. Tiqilɛin wejdent, iweryan ttwaheggan, yeqqim ad iban anwi i d ifrax ara yettwiṭfen. Lḥir n ukersi yekka-d nnig ṣṣwab. Urar si zman yettwerqed, tiḥjurin yettrusun ɣef tiddas flant. Si yal tama ikcem-d waḍu n leɣrur. Ziɣ lḥif n tyemmatin mazal yekfa. Ziɣ mazal ad ggujlen warrac/ ziɣ mazal ad ǧlent lxalat. Igudar iḥulfan s udrar mi yenhez, mmektan-d ccna yexnubren ɣef talaɣt n lmerta :
Deg useggas n talta u settinMbawlent yakk tudrin
Tecfam amzun d iḍelli
Aɣilif anwi iɣ- t-id yewwin
Iferq-it d aɛwin
Mmuten yirgazen lɛali
Sserɣen-aɣ tizemrin
Nhudent tɣaltin
Nemmuger s yidmaren-nneɣ tiɣaltin
Lmut tufa lebɣi-s. Tesnejla wid tesnejla. Lbaṭel ibedd leɛlam-is, yettwarez win yettwarzen. Tilelli sellaw wudem-is, temdel tawwurt yessufuɣen ɣer ugni, ldint tizrugin yettawin ɣer tujegḥa d leḥbas. Deg unyir yura zyada n lemṛar, zyada n ddel, zyada n tmuḥqranit. Wid yettwalin am Mulud Ferɛun yuɣ lḥal caren-d (awal d aciri yella di lemtel) ɣef wannect-a uqbel ad yeḍru: «ɣriɣ si rrif ɣer rrif uṭun ufrid n uɣmis «Moujdahid». Sḥasfeɣ mačči d kra imi dliɣ ɣef uɣanib yelsan talaba n leḥmaq. Ttnefxa akked uburef d netta i yeččuren tiwriqin n tesɣunt meṛṛa. Ufiɣ tira Tessa s tikta n leɣrur izedwen ɣef ufurk n timhujrit, tinna akken yesmerjiḥen ɣef ugeṭṭum n nniya. Ma yella d ttin i d tafrara n waggagen n FLN, aqli qeḍɛeɣ layas d akken ur d-yettili ara rbeḥ yid-sen. Zemren si tirgin n tmes ad skenfen taswin n yimdanen. Lexdeɛ n widen yettganin melmi ara d- ters turet ɣer lmida yeffer deffir n umendil n tsusmi-nsen, wamma yettban kan qassen-tt i yir azekka. Ttuɣaḍen yifellaḥen, inelmaden, tulawin d yilmeẓyen ur negzi taluft, acku icenga-nsen n uzekka ugaren wid n tura». Igudar, yejlan seg udrar (d akken nnuɣnin) cfan i ccna i d-ileqḍen imeslayen seg yixef n waggas :
Wid yerwan di tmurt-nneɣAkken ilaq ass-a
D wid i aɣ- yettruẓun ifadden
Asmi d- nedha d tirẓi–nneɣ
Teɣli targit ɣer wanu n ulejlej. Widen yenwan izerfan i tmurt, widen yenwan lxir ad iɛum wakali teffeɣ-asen mxalfa targit. Aḍu i d-yekkan si Maṣer yesbeɣ timadit n Yizzayriyen. Di ccaw, tuɣal lqibla ɣer teɛrabt d tneslemt, ma d ayen nniḍen ulac. Wicqa ma yella tikli ɣef yiwen n uḍar d asḥurejdel ! Si zman, akka i yella lḥal, d at yiɣil wuɣur i d-tettegray ṣrima. Mi tt-ṭṭfen, d nitni ara s-iwehhin abrid i tegmert. Allen n yigudar yugin kennu dlant ɣef ccna yesduqsen tasa :
Ad d-nesmekti lǧil yettuƔef uḍar, assen mi iẓmeḍ arkas
Mi yeftel i uɛdaw seksu
Nekk fetleɣ-_as d aḥlalas
Asmi tekfa deɛwessu
Ɣliɣ ɣer ddaw leɛnaya-s.
Ɣef umres n yizerfan tessa takka n txidas. Akken kra ad ɣelten (assen i d- tegra tunṭict neɣ tisigert) ɛemden i laṣel ad yeɣbu. Ɛemden tamurt ad ttettwasbeɣ s nnekwa tajenṭaḍt. Tamurt am teneqlet n ubrid tuɣal mebɣir imawlan. Tamurt, tuɣal d tṭeṛha, deg win i d- yusan ad yesserwet. Srewten, segran-d akerfa, tufeg tirect ɣer wanda ur tt-id-yettemlil ḥedd. Igudar ur negzim layas, sukken tamuɣli ɣef lǧerra n tidet, skfelen ccna i d-yekkan nnig n tsusmi.
Leɛnaya-k tecba ameṣmarYeṛsan di tesga yeqqim
Nekk ad gganiɣ amnar
Seg ufus-ik ma ad ččeɣ alqim
Si tasaft i d- giɣ asɣar
Mačči d dderga uɣanim !
Tuccar n lmuḥal ɣzant deg yikusman n yirgazen ilelliyen. Widen yellan deffir n tegrawla ttwaɛzlen neɣ ttwanɣan. Leḥkem yuɣal d tagelda i kra, ḥewsen ayen yellan. Akken ad yijhid llem-nsen xelqen-d talafsa m sebɛa iqerra : akabar awḥid n FLN. Iɣallen ara s-yerren lkil i lmizan tufa-ten-id tegnit d imeɛlalen. D awezɣi ad yefk ugudu lexrif, ulac ṭṭmeɛ ɣer ljiha n wid yesfuṛuyen isebbiyen n tmenqas. Igudar yettwalin ɣer zdat cnan ɣef umennuɣ ameqran, win ara d- yerren ahat azref i yimelliẓ yennuɣnan :
Ad nbedd ɣef tizi n wass-aAkken ad nessiked
Amek ara yili uzekka
Yemmuger-aɣ-id umennuɣ
Amennuɣ, nekni ad t-nedhem
Ɣef yizerfan-nneɣ
Win i aɣ-yerẓan ad t-nessedrem
S yifadden n tdukli-nneɣ.
Ait Slimane Hamid
Articles
Aucun commentaire:
Enregistrer un commentaire